काठमाडौं । सहिद स्मारक ‘ए’ डिभजिन लिगमा यस सिजनमा ललितपुरका क्लबहरूको वर्चस्व छ । हुन त शीर्ष डिभिजन लिग उपत्यकाबाहिर जान सकेको छैन । उपत्यकामै पनि यसअघि काठमाडौंको दबदबा हुन्थ्यो । तर, पछिल्लो समय त्यो ललितपुरमा सरेको छ । यसपटक लिगमा १४ मध्ये ६ क्लब ललितपुरकै हुन् । तिनै ६ ललितपुरे क्लबमध्येको एक हो, फ्रेन्ड्स क्लब ।

काठमाडौंसँग सीमाना जोडिएको कुपोन्डोलका युवाहरूले २०२९ सालमा स्थापना गरेको क्लब हो, फ्रेन्ड्स । ‘ए’ डिभिजन लिगमा फ्रेन्ड्सको पनि पुरानो इतिहास छ । २०३१ सालमा ‘ए’ डिभिजन लिगमा उक्लिएपछि अहिलेसम्म तल झरेको छैन । मतलब रेलिगेसनमा परेको छैन । नियमित ‘ए’ डिभिजन लिग खेल्ने थोरै क्लबमध्यको एक फ्रेन्ड्स पनि हो । 

एक समय फ्रेन्ड्स क्लब नखेल्ने चर्चित खेलाडी कमै हुन्थे । तत्कालीन समयमा नेपाली फुटबलका स्टार खेलाडी गणेश थापा, विज्ञानराज शर्मा, भक्तराज कर्णीकार, विदुर विष्ट, नरेन्द्रमान सिंह, वाईबी घले, रञ्जन विष्ट, कृष्ण थापालगायतका खेलाडीले फ्रेन्ड्सबाट खेले ।