आशा फाउण्डेशनले हेटौंडा–७ मा सञ्चालन गरेको आशा विशेष पाठशाला तथा पुनर्स्थापना केन्द्रले धेरै बौद्धिक अपाङ्ग बालबालिकाको जीवन र दैनिकीलाई सहज तुल्याउने काम गरेको छ । जन्मजात बौद्धिक अपाङ्ग भएका बालबालिकाको संरक्षण, हेरचाह, शिक्षा लगायतको काम गदै आएको आशा विद्यालयले त्यस्ता बालबालिकाको दैनिकीमा हेरफेर गरिदिएको छ ।
पहिले हेला र घृणामा बाँच्न बाध्य बालबालिकाहरुको अहिले दैनिकी फेरिएको मात्र होइन, समाज र पारिवारिक माया तथा स्नेह पाउन थालेका छन् । हाल आशा विद्यालयमा ४४ जना विद्यार्थी अध्ययनरत छन् । आवश्यक भवन लगायतका व्यवस्थापन नहुँदा थप एक सयजना विद्यार्थी विद्यालयमा प्रवेशको पर्खाइमा छन् ।
आशा फाउण्डेशनले गत वर्षबाट सानेपा–२ ललितपुरमा आशा विशेष पूर्व व्यवसायिक शिक्षा तथा सिपमुलक तालिम केन्द्र सञ्चालन गरी १८ वर्ष माथिका २४ जना शारीरिक तथा बौद्धिक अपाङ्गता भएका विद्यार्थीलाई शिक्षा प्रदान गर्दै आएको छ ।
यस पूर्व व्यावसायिक सिपमुलक तालिम केन्द्रको उद्देश्य उनीहरुलाई सिपको पहिचान गरी आत्मनिर्भर बनाउने हो । यसै वर्षबाट प्रदेश नम्बर २ को बर्दिबासमा पनि विद्यालय सञ्चालन गर्ने प्रक्रिया अघि बढाएको छ ।
