कात्तिक दोस्रो साता कर्णाली, बागमती र प्रदेश १ मा सरकार परिवर्तन भई एमाले सत्ताविहीन भएपछि लुम्बिनी प्रदेशका पूर्व मुख्यमन्त्री शंकर पोखरेलले सामाजिक सञ्जालमा यस्तो स्टाटस लेखे,  ‘प्रदेश सभामा ४० मा ६ , ९३ मा १० र ११० मा १३ सिट हुनेले सरकार नेतृत्व गर्ने गठबन्धनको पछिल्लो अभ्यासले जनादेशलाई मजाकको विषय बनायो ।’

पोखरेलले भनेजस्तै कर्णालीमा ६ सिट मात्र भएको काँग्रेसले सरकारको नेतृत्व गरेको छ । काँग्रेसका जीवनबहादुर शाही कर्णालीको मुख्यमन्त्री बनेका छन् । बागमती १३ सिटमात्र रहेको माधव नेपाल नेतृत्वको नेकपा (एकीकृत समाजवादी) का नेता राजेन्द्रप्रसाद पाण्डे मुख्यमन्त्री बनेका छन् ।

त्यस्तै, प्रदेश १ मा पनि १० सिट मात्र भएको नेकपा (एकीकृत समाजवादी) सरकारको नेतृत्वमा पुगेको छ ।  एमालेका भीम आचार्यलाई विस्थापित गरेर राजेन्द्र राई प्रदेश १ को मुख्यमन्त्री बनेका छन् ।

योसँगै प्रदेश १, बागमती, गण्डकी, लुम्बिनी र कर्णाली प्रदेशमा सबैभन्दा ठूलो दल एमाले विपक्षी कित्तामा पुगेको छ । ठूलो दलचाँहि प्रतिपक्षमा सानो दल सरकारमा पुगेपछि एमाले नेता  पोखरेलले यसलाई ‘जनादेशको मजाक’ बताएका हुन् ।