आजकल दिनहुँजसो पालिकाहरूमा प्रारम्भिक बाल विकास कार्यक्रमका शिक्षक/कर्मचारी आन्दोलन र धर्नाका कार्यक्रम चलाइरहेका छन्। मेलापर्वका मुखमा तथा दसैँ/तिहारका बीचमा समेत पालिकाहरूमा आन्दोलन र धर्ना चलिरहेकै छन्। राज्यले निर्धारण गरेको न्यूनतम पारिश्रमिक तथा राष्ट्रिय बजेटमा व्यवस्था भएको सुविधासमेत प्राप्त गर्न नसकेका कारण उनीहरू आन्दोलनमा होमिएका हुन्।
नेपाल सरकारले पठन संस्कृतिको विकास गर्नका लागि प्राथमिक विद्यालयमा अध्ययन गर्नुपूर्व एकवर्षे प्रारम्भिक बाल विकास अर्थात शिशु कक्षाको व्यवस्था मिलाएको छ। शिशु कक्षाले विद्यालय भर्ना अभियान तथा बिचैमा विद्यालय छाड्ने दरमा कमी ल्याउने अपेक्षा गरिए पनि व्यवस्थापनगत कमजोरीका कारण प्रारम्भिक बाल विकास कार्यक्रम भालुका मुखको कुभिन्डो सावित हुँदै आएको छ।
