फरक–फरक नीति अबलम्बन गरेका दुई पार्टीबीच एकीकरण भएर जन्मेको नेपाली कांग्रेसमा स्थापनाकालबाटै गुटहरु सक्रिय छन्। २०७२ फागुनमा सम्पन्न १३ औँ महाधिवेशनबाट भने कांग्रेसमा स्पष्ट रुपमा तीन समूह देखिएका छन्– संस्थापन समूह, पौडेल समूह र सिटौला समूह।
यी तीन गुटका नेतृत्व गरिरहेका छन्– प्रधानमन्त्री तथा सभापति शेरबहादुर देउवा, वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलाले।
तर, १३ औँबाट १४ औँ महाधिवेशनसम्म आइपुग्दा केही नेताहरुले समूह परिवर्तन गरेका छन्। त्यसरी समूह बदल्ने चर्चित नेता हुन्, गगन थापा।
अघिल्लो पटक सिटौला समूहबाट महामन्त्रीका उम्मेदवार थापा अहिले पौडेल समूहमा खुल्दै खुल्दै गएका छन्। बुधबार सिटौलाले राखेको उनको समूहको बैठकमा उपस्थित नभएर थापाले आफु पौडेल समूहतिर लागेको थप स्पष्ट गरेका छन्।
