कताकताबाट घरीघरी एउटै आवाज सुनिएजस्तो लागिरहेथ्यो। सपनामा हो कि विपनामा, होसमा हो कि बेहोसमा जस्तो। घरी त्यो टेलिफोनको आवाजजस्तो सुनिन्थ्यो, घरी मोबाइलको रिङटोनजस्तो। घरी डोरबेलको आवाजजस्तो पनि।
म आँखा उघार्ने प्रयत्न गरिरहेकी थिएँ, तर मेरा आँखा केले टालिएका थिए कुन्नि, उघार्नै सकिरहेकी थिइनँ। अकस्मात् तीनवटै आवाज मिसिएर एकैचोटि कर्कश आवाज गुन्जिएजस्तो लाग्यो।
बल्ल मेरा आँखा खुले। म यति थकित महसुस गरिरहेकी थिएँ, मानौँ महिनौँदेखि ओछ्यानमै कुँजिएर बस्न विवश दीर्घरोगी हुँ।
