दुई साताअघिको घटना हो। एक पुरुष आफूलाई आत्महत्या गर्न प्रेरित गरेको भन्दै उजुरी लिएर पुगे प्रहरीकहाँ। उजुरीको एक पक्ष उनी आफैँ थिए। अर्को पक्ष उनका आफन्त। अर्थात् आफ्नै साढु दाइले आफूलाई आत्महत्याका लागि प्रेरित गरेको भन्दै प्रहरीसम्म पुगे उनी।
प्रहरीले सबै घटनाक्रम बुझ्यो। ठाडो उजुरीसमेत दिन लगायो। अरु उजुरीभन्दा यस घटना केही नौलो थियो। किनकि 'मलाई आत्महत्याका लागि प्रेरित गर्यो' भन्दै आफैँ नै दुरुत्साहनको उजुरी लिएर पुगेका थिए ती युवक। घटना नौलो यसकारण थियो कि सामान्यतया कसैले आत्महत्या गरेपछि उसका आफन्त र नजिकका मानिस आत्महत्या दुरुत्साहनको उजुरी लिएर प्रहरीकहाँ पुग्ने गर्छन्। तर, उनी आफैँ दुईचोटि विष सेवन गर्न र मर्न उक्साएको भन्दै प्रहरीकहाँ पुगेका थिए।
उनले विष खाएको र त्यसपछि अस्पतालमा भर्ना भएर उपचार गरेको कागजपत्र समेत लिएर पुगेका थिए, प्रहरीकहाँ। किटानी जाहेरी थियो उनको।
आखिर किन दुरुत्साहनको मुद्दा लिएर आफैँ पुगे त?
उजुरी दिन पुगेका ती व्यक्ति पेशाले पेटी ठेकेदार। काभ्रेपलाञ्चोकको पाँचखालमा बाटो बनाउन एक करोडको ठेक्का पाएका रहेछन् उनले। ठेक्का दिने मुल ठेकेदार कम्पनी चाहिँ उनको साढु दाइको रहेछ। उनले ठेक्का अनुसार नै काम गरे। तर, जब सडकको काम पूरा भयो '४७ लाखको काममात्र भएको' भन्दै बाँकी पैसा दिन साढु दाइले इन्कार गरेछन्। बाँकी पैसा नपाएको झोकमा उनी आत्महत्या गर्ने सोचमा पुगेका रहेछन्।
