चाडबाड नजिकिँदै जाँदा तिनलाई लक्षित गरेर नेपाली व्यवसायीहरूले चीनबाट किनेका सयौँ कन्टेनर समयमै नेपाल नआउने देखिएको चिन्ता व्यवसायीहरूले प्रकट गरेका छन्।
तर चिनियाँ पक्षले तातोपानीबाट त्यसको सङ्ख्या दोबर पारिदिने बताएको ल्हासास्थित नेपाली महावाणिज्यदूतले बीबीसीलाई बताएका छन्।
यतिखेर तातोपानी हुँदै दैनिक औसतमा १० र केरूङ्ग हुँदै दैनिक ९ कन्टेनर मात्र नेपाल भित्रन दिइनुलाई चिनियाँ अधिकारीहरूले कोभिड महामारीलाई कारण बताएको ल्हासास्थित नेपाली महावाणिज्यदूत नवराज ढकालले बताए।
बिहीवार ढकालले तिब्बत सरकारका वाणिज्य र भन्सार अधिकारीहरूसँग छलफल गरेपछि उनीहरूले तातोपानीबाट नेपाल जाने कन्टेनरको सङ्ख्या दोबर पारिदिने जनाएको बताएका छन्।
