ओमान भ्रमणमा जानुअगाडि नेपाली क्रिकेट टोलीसामु थुप्रै चुनौती थिए।
पूर्वकप्तान पारस खड्काको संन्यास, कोरोनाभाइरस सङ्क्रमणबीच गरिएको अपूरो तयारी अनि भ्रमणमा निस्कने बेला प्रशिक्षक डेव ह्वाटमोरको राजीनामा घोषणा।
यी अन्योलबीच सात राष्ट्रबीचको प्रतिस्पर्धामा छैटौँ स्थानमा रहेको नेपालले अमेरिका र ओमानविरुद्ध सफल नतिजा निकाल्नुपर्ने चुनौती थियो।
र, चार खेलको शृङ्खला र दुई मैत्रीपूर्ण खेल समेतको समाप्तिपछि समग्रमा नेपालको प्रदर्शन सफलता/असफलताको सम्मिश्रण बनेको देखिन्छ।
केही आलोचना विशेषत: ब्याटिङ क्षेत्रमा नेपालले 'अझ धेरै सुधार' गर्नुपर्ने फेरि पनि देखिएको छ।
यद्यपि नेपालले केही कीर्तिमान रच्दै केही खेलमा अविस्मरणीय प्रदर्शन गरेको छ।
