हरितालिका तीज (२४ भदौ) का दिन काठमाडौं ओर्लिंदा मिलेनियम च्यालेन्ज कर्पाेरेसन (एमसीसी) उपाध्यक्ष फतिमा सुमारले भनेकी थिइन्, ‘एमसीसीबारे नेपालीहरूमा रहेको ‘कन्फ्युजन’ मेट्न म नेपाल भ्रमणमा आएकी हुँ।’
संयोगले तीजका दिन आइपुगेकी ‘अमेरिकी चेली’ सुमारमा ‘एमसीसी’बारे नेपालीहरूमा रहेको ‘कन्फ्युजन’ मेटेर संसदबाट पारित हुने वातावरण सिर्जना गर्नेमा ‘कन्फिडेन्स’ देखिन्थ्यो।
सुमारसहितको टोलीले जब काठमाडौंमा शीर्ष नेताहरूसँग भेटघाट थाल्यो, सिचुवान युनिभर्सिटी (चीन) मा प्राध्यापनरत बुद्धि शर्माले फेसबुकमा रमाइलो स्टाटस लेखे, ‘नेपाली नेताहरूले एमसीसीवालाहरूलाई पनि जनतालाई झैं ‘छलफलमा छौं, निष्कर्ष निकाल्छौं, सकरात्मक छौं, हुनुपर्छ भन्नेमा छौं’जस्ता कुरा गरेरै रनभुल्ल पार्ने भए। यो शैली देखेर एमसीसीवालाहरू पनि चकित परेका होलान्!’
शर्माले भनेजस्तै, नेपाली नेताहरूका कुराले उपाध्यक्ष सुमारलाई पक्कै चकित पार्यो नै। तर त्यो भन्दा बढी सुमार स्वयंलाई ‘कन्फ्युजन’मा पार्यो। कुनै बेला पक्षमा रहेका नेताहरू विरोधमा, एउटै सत्ता गठबन्धनमा रहेका पार्टीमध्ये कसैको समर्थन, कसैको विरोधका कारण एमसीसी पारित हुने/नहुने कुराको उनले अनुमानै गर्न सकिनन् सायद।
