सिरहा नगरपालिकाको कार्यालयबाट प्रमुख अशेश्वर यादवको घरको दूरी करिब एक किलोमिटर छ। तर, उनले नगरपालिकाबाट घरभाडाबापत मासिक २५ हजार रूपैयाँका दरले भुक्तानी लिइरहेको पाइएको छ। सिरहा नगरपालिकाको–८ महिसोथामा उनको आलिसान घर छ। कार्यालयनजिकै निजी घर भए पनि यादवले २०७४ असार २० गतेको दोस्रो नगरसभाबाट मासिक २५ हजार रूपैयाँका दरले घरघाडा भुक्तानीको निर्णय पारित गराएका थिए। नगर प्रमुखको हैसियतमा उनले नगरपालिकाबाट विलासी गाडी प्राप्त गरेका छन्।
प्रदेश २ अन्तर्गत स्थानीय तहका पदाधिकारी तथा सदस्यको सुविधासम्बन्धी ऐन, २०७५ अनुसार पालिका प्रमुखको आवासका लागि घरभाडा उपलब्ध गराउन मिल्ने व्यवस्था छैन। तर, दोस्रो नगरसभाको निर्णय नं. २० का आधारमा नगरप्रमुख यादवले ऐनमा व्यवस्था नभएको सुविधा लिएको महालेखा परीक्षकको प्रतिवेदनमा उल्लेख छ।
