नेपालमा कोरोनाभाइरस महामारीको दोस्रो लहर उच्च विन्दुबाट घटेर हाल स्थिर बनेकोले अवस्था केही सहज देखिए पनि अर्को लहर वा सङ्क्रमण बढ्ने जोखिम कम नभएको विज्ञहरूले बताएका छन्।
तथ्याङ्क अनुसार साउन पहिलो साता पीसीआर परीक्षण गराएका कुल ३८,८७० मध्ये २१ प्रतिशतमा कोरोनाभाइरसको सङ्क्रमण पुष्टि भएको थियो। एक महिनापछि अर्थात् भदौ पहिलो सातामा पीसीआर परीक्षण गराएका कुल ६०,१ ६५ मध्ये १९ प्रतिशतमा सङ्क्रमण देखियो।
तुलनात्मक रूपमा परीक्षण गराउनेको सङ्ख्या डेढ गुणा बढेको र सङ्क्रमण पुष्टि दर भने केही घटेको देखिन्छ।
सङ्क्रामक रोग विज्ञ डा. जनक कोइराला निषेधाज्ञाका कारण सङ्क्रमण दर घटेकोजस्तो देखिएको र अहिले नयाँ लहरको सङ्केत देखा नपरेको बताउँछन्।
उनी भन्छन्, "कुल परीक्षण गर्नेमध्ये सङ्क्रमण हुनेको प्रतिशत घटेको छ। एकताका ३५ प्रतिशतभन्दा बढीमा सङ्क्रमण पुष्टि भएको थियो भने हाल २० प्रतिशत हाराहारीमा मानिस सङ्क्रमित भएका छन्।"
"सङ्क्रमण दर स्वात्तै घटेर फेरि उच्च विन्दुमा पुगेको छैन त्यसैले नयाँ लहर सुरु भएको छैन।"
