विचार सकिएपछि ‘फोर्स’ गठनको होडबाजी
संसद्मा सबैभन्दा ठूलो राजनीतिक दल हो–नेकपा एमाले । प्रतिनिधि सभामा २७५ मध्ये १२१ सिट सांसद सङ्ख्या जितेको यो पार्टीमा आन्तरिक कलह मौलाउँदो छ । अध्यक्ष केपी शर्मा ओली र वरिष्ठ नेता माधव नेपाल दुई समूहमा विभाजित भएसँगै एमालेभित्रको कलह व्यवस्थापन गर्न चुनौती बढ्दै गएको छ । बरु विचार, सिद्धान्त र नीतिलाई पन्छाउँदै यो पार्टीको एक पक्षले अर्को पक्षलाई थर्काउन, तर्साउन र ठिक पार्ने उद्देश्यले विभिन्न ‘फोर्स’ गठनको होडबाजी चलेको छ ।
भर्खरै सत्ताबाट बाहिरिएको नेकपा एमालेले युथ फोर्स, अखिल फोर्स र आइटी आर्मी जस्ता लडाकु दस्ताको झल्को दिने ‘फोर्स’हरू गठन गरेपछि समाजमा आतङ्क फैलाउन सहयोग पुग्ने भन्दै पार्टीभित्र र बाहिर समेत चर्को आलोचना सुरु भएको छ ।
सभ्य समाजमा सुहाउँदैन : टङ्क कार्की
पूर्व राजदूत तथा एमाले नेता टङ्क कार्की विचारको महत्त्व भन्दा पनि अरू कुनै चरित्र र साधन स्रोतले राजनीतिलाई बलियो बनाउँछ भन्ने सोचको विकास भएकाले दलहरू यस्ता फोर्स गठनतिर लागेको बताउँछन् । विचारभन्दा बाहुबलतर्फ दलहरूको ध्यान जानु चिन्ताको विषय भएको उनी ठान्छन् ।
‘एउटा सिरानीमुनि सिरुपाते खुकुरी राखेको छु, निकाल्नु नपरोस् भन्छ, अर्को छोएर त हेर् तेरा खुट्टा टुक्रा–टुक्रा बनाइदिन्छु भन्छ’, एमालेका दुई पक्ष अध्यक्ष केपी शर्मा ओली र माधव नेपाल पक्षलाई सङ्केत गर्दै कार्की भन्छन्, ‘कानुनी शासनका अवधारणलाई मान्नेहरूले कानुनलाई हातमा लिन्छु भनेर यस्ता अभिव्यक्ति दिन र सोही खालका व्यवहार प्रदर्शन गर्न सभ्य समाजमा सुहाउँदै सुहाउँदैन ।’
