.jpg)
पोखराः बाँच्ने आश हराइसकेको थियो। बाँच्नुभन्दा मर्दा नै जितिन्छ जस्तो लाग्यो सानुलाई
जीवनमा आएका समस्यालाई झेलेर बाँच्न नखोजेकी पनि होइनन् उनले। तर कतैबाट पनि साथ नमिलेपछि मर्नु नै उनले अन्तिम विकल्प देखिन्।
भर्खरै १८ वसन्त टेकेकी सानुले (नाम परिवर्तन) हाम फालेर प्राणज्यान त्याग्ने निर्णय गरिन्। साहस बटुलेर जेठ १८ गते पोखराको केआइसिंह पुलमा पुगिन्। मर्न पनि कहाँ सजिलो रहेछ र! सानुले पुलबाट हाम्फालिन् सेती नदीमा। तरको प्राण गएन। खोलामा लगाएको जालीले जोगायो उनलाई।
प्रहरीले उद्धार गर्यो। १८ वर्षको उमेरमा नै सानुलाई के त्यस्तो आपत् आइलाग्यो जसले उनलाई आत्महत्या सम्मको बाटो देखायो? सानुको आमालाई प्रहरीले मनोसामाजिक परामर्श आवश्यक परेको जानकारी दियो। प्रहरीले उनलाई कोपिला नेपाल नामक संस्थाको संरक्षण र परामर्शमा पठाइन्। प्रहरीले एक महिनासम्म आमालाई समेत भेट्न नआउनु भनिएको थियो।
छोरीले किन आत्महत्या गर्न खोजी भन्ने प्रश्नले आमाको मन एक महिनासम्म छटपटीमा नै बित्यो। अनेकन तर्कना मनमा खेले।
१ महिनासम्म सानु पनि केही बोलिनन्। असार २२ गते जब उनलाई भेट्न आमा पुगिन्। त्यसपछि सानुले आफ्नो सबै घटनाको बेलिबिस्तार लगाइन्।
+++
दुई वर्षअघि कास्की माछापुच्छेका २५ वर्षीय रोहन सुनार (नाम परिवर्तन) र बाटुले चौर बस्ने सानु बिच फेसबुकमार्फत चिन जान हुन्छ। उनीहरू बिच केही समय भर्चुअल सम्बन्ध विकास हुँदै जान्छ। रोहन प्रहरीमा काम गर्ने। सानुको काम गर्ने उमेर नै भएको थिएन। भर्खर १६ वर्षमात्र पुगेकी।
सामाजिक सञ्जालले रोहन र सानुलाई झन् नजिक गराइदियो। रातदिन कुराकानी चल्न थाल्यो। कुराकानी फेसबुकको च्याटमा मात्र सीमित भएन। दाइ नभएको मौका छोपेर उनीहरू कोठामा नै भेटघाट गर्न थाले।
२०७६ चैत २७ गते दाइ नभएको मौका छोपेर रोहन सानुको कोठामा पुगे। सानु १६ वर्ष उमेरकी भएको कुरा रोहनले बिर्सिए वा सम्झिए पनि आफूलाई सम्हाल्न सकेनन्। उनीहरू बिच शारीरिक सम्पर्क भयो।
