नयाँ दिल्लीस्थित प्रहरी स्टेशनमा एक युवती काखमा सानी बालिका च्यापेर उभिइरहेकी छिन् । शरीरमा एउटा साधारण टिसर्ट, अति साधारण ट्राउजर र चप्पल लगाएकी । ख्याउटे शरीर, मानौं कैयन दिनदेखि खान नपाएकी । प्रहरी कार्यालयका अधिकारी उनको बयान टिपोट गर्दै छन् । नेपालीभाषी ती युवतीको भाषा नबुझेर अर्का नेपाली नागरिकले हिन्दी भाषामा अनुवाद समेत गराइरहेका छन् ।

ती युवती हुन्, अर्घाखाँची घर भएकी २२ वर्षीय सुस्मिता शर्मा (नाम परिवर्तन) । उमेर भर्खरै २२ वर्ष । उमेरले भर्खरै बिहे गर्ने बेला भए पनि ४ वर्ष अगाडि नै उनको विवाह भइसकेको थियो । काखमा अहिले १ वर्षकी छोरी छिन् ।

प्रहरी कार्यालयमा आफ्नै पतिविरुद्ध एफआईआर दिँदै छिन् उनी । उनको साथमा उनका बुवा र भारतमा बसी नेपाली महिला र बालबालिकाको उद्धारमा खटिने नेपालको टोली छ ।

उनीहरुकै बीच सुस्मिताले किटानी जाहेरी दिइरहेकी छिन् कि उनलाई उनका पतिले के के गरे । र, यतिबेला सुस्मिता दिल्लीस्थित आरक्षण गृहमा छिन् भने उनका श्रीमान दिल्लीको जेल पुगेका छन् ।

यस्तो छ सुस्मिताको यातना श्रृङ्खला र दिल्ली कथा

सुस्मिताको माइती गुल्मी हो । उनी गुल्मीमै कक्षा १२ मा अध्ययनरत रहँदा अर्घाखाँचीबाट उनको मगनी भयो । विवाहको प्रस्ताव आएपछि केटाको परिवार हेरियो । जात मिल्ने, भूगोल मिल्ने र केटा पनि पढेलेखेको भन्ने सुनेपछि सुस्मिताका बुवा छोरीको विवाह गरिदिन राजी भए । गरीब परिवारकी सुस्मिता पनि बुवाले थप पढाउन नसक्ने अवस्थाका कारण पढाउने शर्तमा विवाह गर्न राजी भइन् ।