शिक्षा, विज्ञान तथा प्रविधि मन्त्री कृष्णगोपाल श्रेष्ठलाई कारवाहीको माग गर्दै काठमाडौंमा प्रदर्शन भएको छ। 

सञ्चारकर्मी रुपा सुनारलाई जातीय विभेदका आधारमा आफ्नो घरमा कोठा नदिएपछि पक्राउ परेकी बबरमहलकी सरस्वती प्रधानलाई  छुटाएर सरकारी गाडीको दुरुपयोग गरी मन्त्री श्रेष्ठले विभेदलाई संरक्षण गर्न खोजेको भन्दै क्रियाशिल दलित पत्रकार संघले माइतीघरमा बिहीवार प्रदर्शन गरेकाे हाे। 

उनीहरुले जातीय विभेद जस्तो विषयलाई राज्यले नै संरक्षण गर्न खोजेकाे आरोप समेत लगाएका छन्। 

जातीय विभेद गरेर रिहा भएकी प्रधानलाई मन्त्रीले नै संरक्षण गर्नु समुदायमा सम्प्रदाय भड्काउनु भएको प्रदर्शनमा सहभागी नेपाल दलित संघका सचिव दिपक सोनीले बताएका छन्। 

‘मन्त्रीले नै जातीय विभेदलाई संरक्षण गर्नु निक्कै गलत कुरा हो, समस्या समाधान गर्नुको साटो सरकारी पदको दुरुपयोग गरी विभेदलाई संरक्षण गर्ने मन्त्री कृष्णगोपाललाई तत्काल कारवाही गर्नुपर्छ।’ सचिव सोनीले भने। 

त्यस्तै, संघले हस्ताक्षर अभियान चलाएर सरकारलाई यस विषयमा ध्यानकार्ष गराएकाे छ।

‘यो निकै गम्भिर विषय हो। यसले समाजलाई झन् भाड्न खोजेको छ। त्यसैले मन्त्रीलाई कारवाही गर्न सरकारलाई दवाव दिन्छौं।’ प्रदर्शनमा सहभागी गणेश विकले भने।