भेरी नदी र झुप्रा खोलाको दोभान। त्यही दोभानमा एक सय पाँच घरपरिवार रहेको वादी समुदायको बाक्लो बस्ती । जुन बस्ती हो झुप्राखोला शान्तिपुर झुप्रा। जो बस्ती रातभरि निदाउँदैन । आकाशमा कालो बादल मडारिन लाग्दा खोलातिरै नजर हुन्छ । कारण, ‘झुप्रा खोलामा आउने बाढीको जोखिम ।’ खोलाको ढिलसँगै लस्करै बनेका बस्ती बाढीको उच्च जोखिममा छ।
लगातारको वर्षासँगै खोलामा आउने बाढी र भेरी नदीले थुनेर बन्ने तालले पूरै बस्ती उच्च जोखिममा रहेको यहाँका बासिन्दाको भनाइ छ । २०७१ सालको बाढीले यो बस्ती पूरै बगाएको थियो । त्यतिबेला यहाँका समुदाय तत्काल भागेपछि मानवीय क्षति भएन। तर घरमा पालिएको भेंडाचौपाया र कुखुरासँगै घर बगायो। बस्तीमै खोला बग्यो । केही दिन अघि एकसाता लगातार भएको वर्षापछि खोलामा पानीको सतह बढ्दा बस्तीसम्मै बाढी पुग्यो तर घरभित्र जलमग्न भएन। करिब पाँच वर्ष अघि लगाइएको तटबन्ध सानो हुँदो गाउँसम्मै बाढी पुगेको स्थानीय बताउँछन्।
खोलासँगै अडेस लागेर बनेको बस्ती बाढीको उच्च जोखिममा भएको उनीहरुले जनाए । ‘हामी बाढीको उच्च जोखिममा छौं,’ यहाँका स्थानीय कर्णबहादुर वादीले भने, ‘हाम्रो सुरक्षाका लागि सरकारले चासो देखाएन ।’ संघ, प्रदेश र स्थानीय तहको चुनावताका नेताहरुले बस्ती सुरक्षित गर्ने आश्वासन दिएको भन्दै उनले भने, ‘चुनाव पछि बाचा पूरा त परकै कुरा हो । अहिलेसम्म पाइलासमेत टेक्नु भएको छैन ।’
