प्रधानमन्त्री केपी शर्मा ओलीले मन्त्रिपरिषद्मा आठ जना मन्त्री/राज्यमन्त्री थपेर आफ्नो मन्त्रिपरिषद्लाई पूर्णआकार दिएका छन्। आजै ४ बजे राष्ट्रपतिबाट सपथग्रहण गर्ने कार्यक्रम छ ।

प्रधानमन्त्री ओलीले बिहीबार विस्तार गरेको मन्त्रिपरिषद्मा खगराज अधिकारी गृहमन्त्री बनेका छन्। यस्तै, सञ्चार तथा सूचना प्रविधिमन्त्रीमा नैनकला थापा नियुक्त भएकी छन् । 

मन्त्री हुने अन्यमा राजकिशोर यादव, ज्वालाकुमारी साह, गणेश पहाडी, नारदमुनि राना थारु, मोहन बानियाँ  रहेका छन्। अब मन्त्रिपरिषद्मा प्रधानमन्त्री, तीन जना उपप्रधानमन्त्री, १८ जना मन्त्री र तीन राज्यमन्त्री भएका छन् ।

राष्ट्रपति विद्यादेवी भण्डारीले ओलीको नेतृत्वमा गत वैशाख ३१ गठित मौजुदा मन्त्रिपरिषद्मा नेपालको संविधानबमोजिम प्रधानमन्त्रीको सिफरिसमा नयाँ नियुक्ति, हेरफेर र कार्यविभाजन गरेकी हुन्। नयाँ मन्त्रीमा यादव जसपा नेता हुन् भने थापा र साह साविक माओवादीका नेता हुन् । पहाडी चाहि यसअघि माधव नेपाल समूहमा थिए।