बालुवाटारका सहयोगीले शुक्रबार बिहान ११ः१५ मा फोन गरेर सवा घन्टापछि अर्थात् १२ः३० बजे प्रधानमन्त्री खड्गप्रसाद शर्मा ओलीले बोलाएको पत्रकार सम्मेलन निम्ति निम्तो गरे। ओलीको कार्यकालमा पत्रकार सम्मेलन भनेर डाकिएका यस्ता अवसर अत्यन्तै कम छन्।
हामीकहाँ प्रधानमन्त्रीले पत्रकार सम्मेलन गरेर आमनागरिकलाई आफ्ना योजना र भावी कदमबारे बताउने चलन केही वर्षदेखि छैन। कहिलेकाहीँ अन्तरक्रिया, छलफल वा यस्तैउस्तै नाममा उनले प्रेसलाई भेट्ने हो। यो निमन्त्रणा तिमीहरूलाई हामीले सम्झेका छौँ है भन्ने जानकारी मात्र हो, त्यसले आमनागरिकको जानकारीमा कुनै इँटा थप्दैन।
मध्यरातमा संसद् विघटन गर्नु रहेछ, ओलीले एउटा रमाइलो गर्न भनेर मात्र यो पत्रकार सम्मेलन आयोजना गरिएका रहेछन् भन्ने पुष्टि भएको छ। लोकतान्त्रिक मुलुकका कार्यकारीले पत्रकार सम्मेलन भनेर बोलाइसकेपछि आफ्ना भावी योजनाबारे खुलेर जानकारी गराउने चलन हुन्छ। हामीकहाँ भने भित्र एउटा योजना हुन्छ, बाहिर अर्कै कुरा गरेर अल्मल्याउने अभिव्यक्ति दिइन्छ। हामीकहाँ जति धेरै ढाँटछल गर्यो, त्यति ठूलो रणनीतिक नेताका रूपमा चर्चित हुन पाइन्छ।
ओलीका पनि भित्री योजना अरू नै थिए। बाहिर प्रेससँग कुरा गर्ने क्रममा आफूले नयाँ सरकारका निम्ति ‘मार्गप्रशस्त’ गरेको बताइरहे। संविधानको धारा ७६(३) अन्तर्गत प्रधानमन्त्री बनेका ओली ३० दिनभित्र विश्वासको मत लिनुको सट्टा धारा ७६ (५)को सरकार बनाउन राष्ट्रपतिलाई सिफारिस गर्न पुगे। ओलीको सिफारिस आउनासाथ भण्डारीले पनि शुक्रबार साँझ ५ बजेसम्ममा नयाँ सरकार दाबी गर्न २१ घन्टे सूचना सार्वजनिक भयो।
