प्रदेश १ (झापा र मोरङ) – झापाको बिएण्डसी अस्पतालमा दैनिक २५ देखि ३० सिलिण्डर अक्सिजन खपत हुने गथ्र्यो। तर मंगलबार उक्त अस्पतालमा १ सय ९० वटा सिलिण्डर खपत भयो।
झापाको बिर्तासिटी अस्पतालमा दैनिक ६ वटा सिलिण्डर लाग्नेमा मंगलबार ६५ वटा सिलिण्डर खपत भएको अक्सिजन आपूर्ति गर्ने डिलरवाला ज्योति खरेलले जानकारी दिए।
एक–दुई दिन यता अस्पतालहरूमा अक्सिजनको खपत १० गुणासम्म बढेपछि अक्सिजन आपूर्ति गर्ने डिलरवालाहरूलाई तनाव सुरु भएको खरेलले बताए।
उनले भने, ‘यही रफ्तारमा बिरामीको चाप बढ्ने हो भने हामीलाई आपूर्ति गर्न गाह्रो हुन्छ। अहिलेदेखि नै कारखानामा सवारी साधनको लाम लाग्न थालिसक्यो।’
झापाको भद्रपुरमा रहेको मेची प्रादेशिक अस्पतालमा सातामा २०–२५ वटा सिलिण्डर खपत हुनेमा अहिले दैनिक ४० वटा सिलिण्डर खपत हुन थालेको छ।
