छायाँको जस्तो अटुट साथ दिन्छु भनेर
प्रेम प्रस्ताव राख्ने
ए प्रीय मान्छे !
अटुट साथ दिने भए मलाई
त्यो छायाँको जस्तो साथ त पटक्कै नदिनु,
छायाँको साथ त
प्रकाश रहुन्जेल सम्म मात्र हुन्छ।
साथ नै दिने भए मलाई,
बरू त्यो आँशुको जस्तो साथ दिनु
जो हुन्छ
- सुखमा पनि सँगै।
- दु:खमा पनि सँगै।
मलाई माया गर्ने
ए प्रीय मान्छे !
यदि आँशुले जस्तो अटुट साथ दिन्छौ भने,
तयार छु म
तिम्री वराङ्गना बन्न।
सक्छौ के तिमी
आँशुले जस्तो साथ दिन ?
सक्छौ भने यदि,
मङ्गलबार आउनु तिमी त्यहीँ पल्पसा क्याफेमा
जहाँ तिम्रो र मेरो मङ्गलबारकै दिन
पहिलो भेट भएको थियो,
र त्यहीँ दिन मङ्गलकार्यका निम्ति मङ्गलडाँडामा
एक/एक वटा 'वर पिपल'का बिरुवा रोपेर
गरौला तिम्रो र मेरो
नवीन सम्बन्धको शिलान्यास।
