कोरोना संक्रमणले मुलुक पूरै संकटमा भासिएका बेला सत्तारुढ दल नेकपा एमालेमा विद्रुप नाटक मञ्चन भइरहेको छ।
यसले असामान्य परिस्थिति सामना गर्न बाध्य नागरिक तहमा भय, चित्कारसँगै आक्रोश बढेको छ। नाटकको मुख्य पात्रको भूमिकाबाट प्रधानमन्त्री केपी शर्मा ओली अझै बाहिरिने संकेत देखिएको छैन।
बरु, सोमबारबाट उनको भूमिका विवादास्पद र अस्वाभाविक बन्दै गएको छ। लुम्बिनी प्रदेशमा सत्ता टिकाउ अभियानमा ओलीका बफादार मुख्यमन्त्री शंकर पोखरेलले आइतबार गरेको शक्ति प्रदर्शन, त्यसलगत्तै संसद्मा विश्वासको मत लिने ओलीको निर्णय र सोमबार गण्डकी र सुदूरपश्चिम प्रदेश प्रमुखलाई पदमुक्त गरी त्यसमा आफ्ना विश्वासपात्रलाई नियुक्तिका लागि ओलीले गरेको सिफारिसबाट त्यसको पुष्टि हुन्छ।
ओली पक्षले केन्द्र र प्रदेशमा सत्ताका लागि चालिरहेको चालको गतिमा महामारीको संकट गहिरिँदै छ। पछिल्लो २४ घण्टामा मुलुकमा ७ हजार ४ सय ४८ जना नयाँ कोरोना संक्रमित थपिए, ३७ जनाको मृत्यु भयो।
पछिल्लो ठीक एक महिनाअघि फेरि तीव्र रूपमा फैलिएको संक्रमण अत्यधिक संक्रामक भएको विज्ञहरूले दाबी गर्दै आएका छन्।
