विश्वविद्यालयबाहिरबाट ज्ञान उत्पादन गर्ने कार्यमा संलग्न गैरसरकारी संस्था मार्टिन चौतारीले प्राज्ञिक कार्यमा संलग्न अर्को गैरसरकारी संस्था संशोधन–मण्डलमा आबद्ध ऐतिहासिक महेशराज पन्तको किताब ‘नेपाली इतिहासको परिवेशः केही ऐतिहासिक र मसीजीवी’ हालसालै प्रकाशन गरेको छ।
किताबमा केही नेपाली मसीजीवी र नेपाली इतिहास लेखनमा काम गरेका अग्रणी ऐतिहासिकहरूको लेखकीय जीवनबारे चर्चा गरिएको छ।
किताबमा जम्मा २५ अध्याय छन्। अध्याय ९ मा छापिएको ‘लेवीलाई लाञ्छना ?’ र अध्याय २५ को ‘नेपालमा पुराविद्याको खोजी’ शीर्षकको लेखबाहेक हरेक अध्यायमा एकजना मसीजीवी वा ऐतिहासिकलाई केन्द्रमा राखी उसको लेखन जीवनबारे संक्षेपमा आलोचना गरिएको छ।
