डा. बाबुराम मरासिनी, जनस्वास्थ्यविद्
हाम्रो स्वास्थ्य प्रणालीमा भएका धेरै कमी कमजोरीलाई सुधार गर्ने अवसर हो महामारी । कोरोना महामारीमा पाएको सास्तीबाट पाठ सिक्दै हामीले एक वर्षमा स्वास्थ्य प्रणाली र संरचनामा धेरै सुधार गर्न सक्थ्यौं ।
तर अत्यावश्यक स्वास्थ्य सेवासँग सम्बन्धित स्लाइन र अक्सिजनसमेत भारतबाट ल्याउनु पर्ने बाध्यता छ । दैनिक दुई हजार संक्रमित भेटिँदा बेडको अभाव हुन थालिसक्यो ।
छिमेकी मुलुक भारतमा कोरोना संक्रमण भुसको आगोझैं फैलिएर संक्रमण दर र मृत्युदर आकासिएको छ । अस्पतालमा बेड अभाव र अक्सिजनको हाहाकार भएको समाचार हामीले सुनिरहेका छौं । नेपालमा पनि संक्रमण बढ्न थाल्यो भने यहाँ अक्सिजन र स्लाइन अभाव हुनसक्छ । किनकि, भारतमै अभाव भएको वस्तु आपूर्ति गर्न कठिन हुन्छ भन्ने कोरोना खोपमा प्रमाणित भइसक्यो ।
अक्सिजन र स्लाइन बनाउने विषय ज्यादै जटिल होइन । पानी हामी आफैंसँग छ, हावा पनि छ । सजिलैसँग यहीँ बनाउन सकिने अतिआवश्यक कुराहरु बनाउन राज्यको ध्यान किन गएन ? यसले महामारीप्रति राज्यको बुझाइ झल्किन्छ ।
