बाँकेको कोहलपुर नगरपालिका १२ स्थित रोहिणी खोला नजिकै शुक्रबार बेलुका भएको दुर्घटनामा मुत्यु हुनेको संख्या ५ पुगेको छ।
इलाका प्रहरी कार्यालय कोहलपुरका अनुसार अहिले ७ जना गम्भीर घाइते छन्।
सुर्खेतबाट धरानतर्फ हिँडेको मे१ख ३३४७ नम्बरको यात्रुबाहक बस र राप्तीसोनारीको सम्शेरन्जबाट कोहलपुरतर्फ आउँदै गरेको टिप्पर एक आपसमा ठोक्किदा दुर्घटना भएको थियो।
दुर्घटनामा एक जनाको घटनास्थलमै मृत्यु भएको थियो। अन्य ४ जनाको उपचारका लागि नेपालगन्ज मेडिकल कलेज शिक्षण अस्पताल कोहलपुर पुर्याएलगत्तै मृत्यु भएको ईलाका प्रहरी कार्यालय कोहलपुरका प्रमुख प्रहरी नायब उपरिक्षक रविन्द्र खनालले बिएल नेपाली सेवालाई जानकारी दिए।
उनका अनुसार घटनास्थलबाट ४७ जना घाइतेको उद्धार गरीएको छ। घाइतेहरुको नेपालगन्ज मेडिकल कलेज शिक्षण अस्पताल कोहलपुरमा उपचार भइरहेको छ।
२ वटा क्रेन र ३ वटा स्काभेटर प्रयोग गरेर दुर्घटनामा घाइते भएकाहरुको उद्धार गरिएको थियो। मृतकको संख्या अझै बढ्न सक्ने अनुमान प्रहरीको छ।
घटनाको पुरा विवरण शनिबार बिहानसम्म आउने बताइएको छ।
