काठमाडौं । वैशाख १, २०७८ का दिन बिहान ८ बजे प्रधानमन्त्रीले राष्ट्रको नाममा सम्बोधन गरे । सो सम्बोधनमा प्रधानमन्त्रीले देशमा सरकारले के के गर्यो भनेर आफ्नै तारिफका पुल बाँधे । यिनै कुरा गरेर आफ्नै तारिफका पुल उनले लामै बाँधेका थिए गत फागुन ३ गते उनको सरकारको तीनवर्ष सम्पन्न भएको उपलक्ष्यमा पनि ।
नेपालमा विकास निर्माणका कामहरू नभएका होइनन् भएका छन् । २०७२ सालको भूकम्पपछि नष्ट भएका संरचनाहरूको पुनःनिर्माणका काममा निकै प्रगति भएको छ ।
रानीपोखरी र धरहरा राम्रा बनेका छन् । राजधानीको दरबार हाइस्कूलसहित देशैभर धेरै विद्यालय भवनहरू बनेका छन् ।
बाटो घाटो, पक्की र झोलुंङ्गे पुल पनि निर्माण भएका छन् । झापाको गलगलियादेखि धनगढीको गढ्ढाचौकीसम्म पुल बनेकै हुन् । तर, विकास भनेको यत्ति नै हो ?
