दिनेश गौतम
छोरो स्कुलबाट नफर्किएसम्म काठमाडौं गौरीघाटकी नविना काफ्लेको मन छटपटिइरहन्छ । गौरीघाटको विश्व शिक्षा सदन स्कुलमा उनका छोरा ९ कक्षामा पढ्छन् । मास्क, स्यानिटाइजर र खाजा घरबाट नै पठाउँछिन् । उनी घरमै हुन्छिन् तर उनको मन भने छोरातिर स्कुलमा दौडिन्छ ।
‘डर र चिन्ताको साध्य छैन । स्कुलमा धेरै बच्चा हुन्छन् । सबैलाई सर मिसले केयर गर्न पनि गाह्रो हुन्छ । अनलाइनबाट पढाउने सुविधा भए राम्रो हुन्थ्यो’, उनी भन्छिन्, ‘घर फर्किँदा संक्रमित भएर आउने त होइन भन्ने डर छ । स्कुल लागेको छ, पढाउन पठाउनै पर्यो ।’
यो मनोदशाबाट उनी मात्र होइन, ७५ लाख बालबालिकाका अभिभावक गुज्रिएका छन् । स्कुल नपठाउ पढाइ छुट्छ, पठाऔँ कोरोना सर्ला भन्ने डर ।
त्यसो त काठमाडौं उपत्यकाका केही अभिभावकले बालबालिका विद्यालय पठाउन छोडेका छन् । नयाँ बानेश्वरकी रामकुमारी बस्नेतकी छोरी इनोभेटिभ इङ्लिस स्कुलमा कक्षा ५ मा पढ्छिन् । बालबालिकामा संक्रमण देखिन थालेपछि छोरीलाई विद्यालय पठाउन छोडेको उनी बताउँछन् ।
