अमेरिका र इराकले युद्दग्रस्त देशहरुमा अमेरिकी नेतृत्वको सैनिकहरुलाई इस्लामिक स्टेट (आइ एस)को विरुद्ध परिचालित गराउन सहमत भएका छन्।
हालै भएको अमेरिका र इराकबीच रणनीतिक छलफलबाट यस्तो सहमती भएको हो। इराकी विदेशमन्त्री फवाद हुसैन र अमेरिकी विदेशमन्त्री एन्टोनी ब्लिङ्कनले नेतृत्व गरेको प्रतिनिधिमण्डलबीच भिडियो कल मार्फत छलफल भएको थियो।
उक्त छलफलमा दुइ देशबीचको सुरक्षा, आतंकवाद, आर्थिक अवस्था, उर्जा र राजनैतिक र सांस्कृतिक सम्बन्धको बारेमा छलफल भएको थियो।
छलफलबाट दुवै देशले द्विपक्षीय सुरक्षा जारी राख्नपनि सहमत भएका छन्।
३ जनवरी २०२० मा बगदाद विमानस्थलमा अमेरिकी सेनाको ड्रोन आक्रमणबाट ईरानको कुद्स फोर्सका पूर्व कमान्डर कासिम सुलेमानी र अर्धसैनिक हैश शाबीको प्रमुख कमान्डर अबू महदी अल-मुहाण्डिसको मृत्यु भएको थियो। त्यसयता इराक र अमेरिका सम्बन्धमा चिसोपना आएको थियो।
त्याे घटनापछि पहिलोपटक भएको अनलाइन वार्तापछि इराक र अमेरिकाको सम्बन्ध सुध्रने अपेक्षा गरिएको छ।
