ठोक्किएर लड्नु र उठ्नुको मजा
के थाहा ती नलड्नेहरुलाई
कि उठाउने हातहरु हुन्छन् वरपर।

नभएर केही पनि पछि हुनु केही 
के आभाष ती भएकाहरुलाई
कि यो अनुभूति छ कति सुखद।

कहिले काहिँ हारेर पनि जित्नुको आनन्द
के बुझोस् ती सधैं जित्न चाहनेहरुले
अरुको मुहारमा आएको हासो को मूल्य।

हराएर पाउनुको खुशी 
के थाहा नहराउनेहरुलाई
कि कति अमूल्य छ हराएको कुरा।

भत्किएर बनिनु र आकार पाउनुको उत्साह
के अर्थ ती भत्किनु नचाहनेहरुलाई
कि कति मीठो छ बनिनुको प्रक्रिया।

कमजोरी मा पाउनु बल,
डरमा पाउनु साहस,
अँध्यारोमा पाउनु प्रकाश,

के थाहा तिनिहरुलाई
यस्तो कुराहरुको मजा,
जसले आफैलाई भनिरहन्छ शक्तिशाली।

के थाहा तिनीहरूलाई 
कि हामी हामी एकार्काको
अँगालो हरु हौ।