मणि दाहाल
नेकपा एमालेभित्र अन्तर-संघर्ष चर्किंदै जाँदा वरिष्ठ नेता झलनाथ खनाल र माधवकुमार नेपाल पक्षले राष्ट्रिय कार्यकर्ता भेला सम्पन्न गरेको छ। गत फागुन २८ गते पार्टीका अध्यक्ष एवं प्रधानमन्त्री केपी शर्मा ओलीले आफ्ना पक्षका केन्द्रीय सदस्यको मात्रै बैठक राखेर एकलौटी महत्वपूर्ण निर्णय गरेपछि खनाल–नेपाल पक्षले ललितपुरस्थित हेरिटेज गार्डेनमा यही चैत ४ र ५ गते राष्ट्रिय भेला आयोजना गरेको हो।
यसै सन्दर्भमा भेलामा सहभागी युवा नेतासँग नेपालखबरले एमाले कसरी अघि बढ्ला, अध्यक्ष ओलीले दिएको कारबाहीको चेतावनीलाई कसरी लिनुभएको छ भनेर सोधेका छौं। प्रस्तुत छ– उनीहरूको विचार :
मञ्जु यादव
प्रदेश सांसद प्रदेश नम्बर २
यो राष्ट्रिय कार्यकर्ता भेला नेकपा एमालेको हो। एमालेभित्र देखिएको द्वन्द्व समाधान गर्न भेला आयोजना गरिएको हो। यो कार्यकर्ता भेलाले हामीभित्र देखिएका समस्या समाधान गर्छ।
कार्यकर्ता पंक्तिले मात्र होइन, सिंगो नेपाली जनताले के बुझेका छन् भने प्रतिनिधि सभा पुनर्स्थापना भइसकेपछि प्रधानमन्त्री केपी शर्मा ओलीको कदम गैरसंवैधानिक र गलत हो। त्यस हिसाबले प्रधानमन्त्रीले राजीनामा दिएर अहिले राष्ट्रिय राजनीतिक संकट समाधान हो भन्ने लाग्छ।
प्रधानमन्त्री तथा पार्टी अध्यक्ष ओलीले कारबाही गर्ने कुनै आधारै छैन। आन्तरिक जीवनमा समस्या आएपछि बसेर छलफल गरेर हल गर्ने एमालेको नीति हो। पार्टीका निर्णय सल्लाह गरेर समाधान निकाल्ने भन्ने हो।
