काठमाडौं : कानुनी रुपमा नेकपा एमाले एउटै छ। तर, एमालेको नाममा मंगलवार काठमाडौं उपत्यकाका तीन ठाउँमा कार्यक्रम भए।
प्रधानमन्त्री तथा पार्टी अध्यक्ष केपी शर्मा ओली समूहले बालुवाटारमा विहान ११ बजेका लागि चियापानको आयोजना गर्दा उपाध्यक्ष वामदेव गौतमले बल्खुमा त्यहीँ समयमा एकता अभियानको बैठक राखे।
वरिष्ठ नेता माधवकुमार नेपाल र झलनाथ खनाल समूह पनि कार्यक्रम गर्न पछि परेन, सानेपास्थित हेरिटेज गार्डेनमा जुट्यो। बालुवाटारको चियापान बहिष्कार गरेको नेपाल-खनाल समूहले ओलीको चर्को आलोचना मात्रै गरेन आफूलाई कारवाही गरेर देखाउन चुनौती नै दियो।
तत्कालीन नेपाल कम्युनिस्ट पार्टी (नेकपा) मा विभाजन आएपछि आफू तेस्रो शक्ति भएको दाबी गरेका वामदेव एमालेमा पनि तेस्रो शक्ति भएको दाबीका साथ गतिविधि गरिरहेका छन्।
उनले प्रधानमन्त्री ओलीको आलोचना त गरेका छन् नै आफू माझधारको भएको देखाउन आफ्नै पार्टीका वरिष्ठ नेता नेपाल र खनालसँगै माओवादी केन्द्रका अध्यक्ष पुष्पकमल दाहाल प्रचण्डको आलोचना गर्न पनि पछि परेनन्। नेपाल-खनाल र ओली समूह मात्रै नभइ तीनतिर फर्किएको एमालेमा हालको बहसको एजेण्डा नै बनेको छ-एमाले जुटाउने को? फुटाउने को?
