दिपकजंग शाही

गत फागुन २४ गते विद्यालय बन्द थियो। यसकारण फुर्सदमा रहेकी आठविस नगरपालिका–३ निमायलकी कल्पना भण्डारीले दिनभर घर परिवारलाई काममा सघाइन्। कल्पनाले बेलुका भान्सामा पनि आफैंले काम गर्ने सोचेकी थिइन्।

करिब सवा ५ बजेको थियो। गाउँभन्दा तल पर्ने कर्णाली नदीमा रहेको पुल नजिकै दुई जनाको शव भेटियो भनेर गाउँमा हल्ला चल्यो। केही समय गाउँमा पनि को हुन् भन्ने थाहा भएन।

घटनास्थलमा पुगेको प्रहरीले शव नदीबाट निकाल्न स्थानीयको सहयोग माग्यो। शव निकाल्न सहयोग गरेका मानिसले उनीहरूलाई प्रष्टै चिने। उनीहरू निमायलका कल्पना बडुवाल र सरिता बडुवाल थिए।

लगत्तै गाउँमा खबर पुग्यो। उनीहरू मानसिंह बडुवालका दुई छोरी थिए। कल्पना भण्डारीले पनि यो कुरा करिब ६ बजेतिर थाहा पाइन्। कल्पना बडुवाल कल्पना भण्डारीकी सबभन्दा निकट साथी थिइन्। उनले आफ्नो भान्सामा काम गर्ने योजना छोडिन्।