बिपी कोइराला मेमोरियल क्यान्सर अस्पतालमा न्यूक्लियर मेडिसिन सेवा पुनः शुरु भएको छ।

स्प्याक्ट गामा क्यामरा मेसिन मर्मतसम्भार गरी पुनः सेवा सञ्चालन गरिएको अस्पतालका कार्यकारी निर्देशक डा देजकुमार गौतमले जानकारी दिए। विगत एक वर्षयता सो मेसिन बिग्रिएर थन्किएको थियो।

‘अस्पतालको रेडियोडायग्नोसिस तथा इमेजिङ विभागअन्तर्गत न्यूक्लियर मेडिसिन युनिटमा क्यान्सरका बिरामीका लागि अतिआवश्यक यो मेसिन मर्मत गरी सञ्चालनमा ल्याइएको हो’ उनले भने।

मेसिन सञ्चालनमा आएसँगै न्यूक्लियर मेडिसिनका परीक्षण तथा उपचार विधि नियमित भएको डा गौतमको भनाइ छ। 

न्यूक्लियर मेडिसिन ‘नाभिकीय चिकित्सा’ मा रेडियोधर्मी अर्थात् रेडिएसन निस्किने औषधिको प्रयोग गरेर बिरामीको विभिन्न रोगको जाँच तथा उपचार गरिने बताउँदै उनले भने, ‘यसबाट बिरामीको विभिन्न अङ्गको गहन जाँच हुन्छ, लगभग सबै अङ्गको जाँच गर्न मिल्छ।’

उनका अनुसार मस्तिष्क, घाँटीको थाइराइड, मुटु, फोक्सो, मिर्गौला, कलेजो, हड्डीको जाँच हुनेछ। ‘हड्डीमा सङ्क्रमण भएको वा हड्डीमा क्यान्सर भएको दुवै किसिमको जाँच गर्न मिल्छ’ उनले भन, ‘अन्य कुनै क्यान्सर हड्डीमा फैलिएको छ कि छैन भन्ने पनि यसबाट पत्ता लगाउन सकिन्छ।’