इंग्ल्यान्डविरुद्ध चार खेलका टेस्ट सिरिजअन्तर्गत तेस्रो खेलमा घरेलु टोली भारतले १३ रनले पछि परेको छ।
पहिलो दिनको समाप्तिमा भारत ३३ ओभरमा ९९–३ को अवस्थामा छ।
ओपनर रोहित शर्मा ५७ र अजिंक्या रहाने १ रनमा नटआउट छन्। रोहितले ८२ बलमा ९ चौका हानेका थिए। कप्तान विराट कोहली २७ रनमा बोल्ड आउट भए।
तेस्रो विकेटका लागि कोहली र शर्माले ६४ रनको साझेदारी गरे। यता ओपनर सुभमन गिल ११ र चेतेश्वर पुजारा शून्यमा आउट भए। ज्याक लेचले २ र जोफ्रा आर्चरले एक विकेट लिए।
त्यसअघि अहमदाबादस्थित मोटेरा रंगशालामा टस जितेर ब्याटिङ गरेको इंग्ल्यान्ड १ सय १२ रनमा अलआउट भयो।
ओपनर क्रलीले ८४ बलमा ५३ रन जोडे। उनले १० चौका हाने। उनी क्रली अक्षर पटेलको बलमा आउट भएका थिए।
तर इंग्ल्यान्डका ६ ब्याट्सम्यानले दोहोरो अंकको स्कोर छुन सकेनन्।
इंग्ल्यान्डलाई सस्तैमा समेट्न भारतका स्पिनर अक्षर पटेल एक्लैले ६ विकेट लिए। रवी आश्विनले ३ तथा इशान्त शर्माले १ विकेट लिए।
सिरिजअन्तर्गत चेन्नईमा भएको पहिलो खेलमा इंग्ल्यान्ड २ सय २७ रनले विजयी भएको थियो। दोस्रो खेलमा भारतले इंग्ल्यान्डलाई ३ सय १७ रनले पराजित गरेको थियो।
