आजभन्दा ठिक २३ वर्ष अगाडि २०५४ माघ २९ गतेको राति माओवादी जनयुद्वको उद्गमथलो रूकुम (अहिलेको पश्चिम रुकुम) को सुदूर उत्तरमा अवस्थित प्रहरी चौकीको नेतृत्व सम्हाल्न सदरमुकामदेखि ३ दिनको बाटो हिँडेर पुग्दैगर्दा एम्बुसमा पारेर त्यहीँ चौकीका २ जना प्रहरी मार्दै प्रहरीको २ नाल राइफल माओवादी छापामारले कब्जा गरेको भर्खर ५ दिन मात्रै भएको थियो। 

सोही हतियार नै माओवादीले प्रहरीबाट कब्जा गरेको पहिलो हतियार थियो।

दिन प्रतिदिन माओवादीको त्रास बढ्दो थियो। मध्यपश्चिम पहाडका दुर्गम गाउँहरू माओवादी जनयुद्वका परेड मैदानमा परिणत हुँदै थिए। मैले जुन चौकीको कमाण्ड सम्हाल्न पुग्दै थिएँ, पुगेर राम्ररी सुस्ताउन पनि नपाउँदै जिल्ला सदरमुकामबाट जिल्ला प्रहरी प्रमुखको सञ्चार आएको थियो, ‘शिब सा'ब, आज राति तपाईँको चौकी हान्दैछ भन्ने सुराक आएको छ है, एलर्ट रहनू।’

त्यसै पनि त्यो साँझ माओवादी जनयुद्वको दोस्रो वर्षगाँठ थियो, त्यसैले उनीहरुको विशेष कार्यक्रम हुने सर्कुलर हामीले पाईसकेका थियौं। त्यसैले उनीहरूको आक्रमणको तयारी नजरअन्दाज नगर्ने कुरै भएन।