फेवातालको बाँध मर्मत गर्न पानी सुकाउँदा कतिपयले ताल हड्प्न खोजेको आशंका गरे। फेवाताल संरक्षण गर्न सरकारले आलटाल गरिरहेका बेला अचानक बाँध खोलेर ताल सुकाइएकाले यस्तो आशंका गरिएको हो। यसअघि पनि यसरी नै फेवाताल सुक्दा तालको जमिन अतिक्रमण भएको थियो।
२०१८ सालमा बनाइएको बाँध २०३१ सालमा फुटेको थियो। त्यति बेला फेवातालमा अहिलेभन्दा कम पानी थियो। बाराही मन्दिर हिँडेरै जान सकिन्थ्यो। तालको बाँध पुनर्निर्माण नहुँदै २०३४ सालमा नापी आयो। पानी नभएको मौका छोपेर हजार रोपनीभन्दा बढी तालको जमिन व्यक्तिका नाममा पास गरिए।
त्यही नजिर दोहोर्याउन खोजिएको भन्दै कतिपय स्थानीय र ताल हेर्न आउने पर्यटक सशंकित छन्।
स्थानीयले शंका गर्नुका पछाडि सर्वोच्च अदालतले फेवाताल संरक्षण गर्न दिएको आदेश पालना नहुनु र सरकार नै ताल संरक्षणमा जिम्मेवार नबन्नु हो। यही शंकालाई बल पुग्ने गरी अहिले फेरि फेवाताल अतिक्रमणका प्रयास भएका छन्।
तालको पानी घटेका कारण पानीले छोपिएको धेरै भागमा जमिन देखिन्छ। त्यही जमिन पुर्न र घडेरी बनाउन पोखरा-१८ स्थित रातमाटामा आइतबार राति डोजर चलाइएको छ। स्थानीय हुमबहादुर थापा र सन्तोष थापाले रातारात डोजर लगाएर ताल पुरेका छन्।
फेवातालको किनार–किनार पामे जाने पक्की बाटोमा राति राति डोजर लगेर पिचसमेत भत्काइएको पोखरा-१८ का वडाध्यक्ष रणबहादुर थापाले बताए। ‘पानी घटेको मौका छोपेर उनीहरूले डोजर चलाए,’ थापाले भने, ‘अरू उद्देश्य केही होइन, ताल पुर्न रातिराति डोजर लगाएका रहेछन्।’
