नेपाली झण्डा फेर्नुपर्छ, अर्को बनाउनुपर्छ भन्दै वितण्डा मच्चाउन खोज्नेहरुले नेपाली झण्डाको इतिहास बुझेका छैनन्। बुझे पनि नबुझेझैँ गर्छन्।

नेपाली झण्डा, नेपाली संस्कृति र आत्मामा बसेको कुरा उनीहरुलाई थाहा छ। त्यसैले त्यसलाई फेर्न पाए नेपाल र नेपालीको ढाड भाच्न सजिलो हुन्छ भन्ने विदेशी फर्मुलाबाट यिनीहरु परिचालित  छन्। 

'फुटाऊ र राज गर' भन्ने पुरानो सूत्र हो– विदेशी राजनीतिको उपेनिवेशवाद समयदेखिको ! कुरा उही मेकालयको जस्तो भयो– 'I do not think we would ever conquer this country, unless we break the very backbone of this nation, which is her spiritual and cultural heritage.' (Macaulay’s address to the British Parliament 2nd February 1835) 

मेकालयले ब्रिटिश संसद्मा १८३५ फेब्रुअरी २ आजकै दिन यो कुरा घोषणा गरेका थिए कि इंडियालाई दास बनाउनको लागि उसको संस्कृति मेटाउनुपर्छ नभए कहिले पनि सकिन्न भनेर ! नेपालका ठूला नेता भनौदाहरुले पनि मेकालयकै दाउपेच लगाउन खोजेका छन्– झण्डा फेर्ने, राष्ट्रिय पशु फेर्ने, नेपालको नामै फेर्नेजस्ता अतिवादी कुरा गरेर ! नेपालको झण्डा बदल्नुपर्छ भन्नेलाई यही लेखबाट यस्ता–यस्ता प्रमाण प्रस्तुत गर्छु, जसले यही नेपाली झण्डा किन जरुरी छ, प्रष्ट हुनेछ।

नेपाली झण्डाको इतिहास हेर्दा देखिन्छ– यो झण्डा नेपालका प्रथम ऎतिहासिक राजा मानदेवको पालादेखि नै नेपालको झण्डा यही आकारमै थियो। किनभने, राजा मानदेवको 'मानाङ्क' मुद्रामा यो झण्डाको चित्र अङ्कित छ। यो कुरा प्राध्यापक डा. जगमान गुरुङले पनि प्रष्ट भन्नुभएको छ। 
मानाङ्क मुद्राको चित्र गुगलमा भेट्न सकिन्छ, जसको तल्लो भागमा त्रिकोण झण्डा विराजमान छ। यसबाट के प्रष्ट हुन्छ भने आजभन्दा लगभग १५०० वर्षअघिदेखि नेपालको झण्डा यही नै हो। यो कुराले नेपाली झण्डाको प्राचीनत्व प्रमाणित गर्छ।

अब नेपाल एकीकरणको प्रसङ्गमा जाऔं। राजा पृथ्वीनारायण शाहले नेपाल एकीकरण गुरु गोरखनाथको आशीर्वादमा गरेको कुरा प्रष्ट छ। गुरु गोरखनाथको किताबमा यो श्लोक उल्लेखित छ।
हकार क्रितितः सूर्यस्य ठकार चन्द्र उच्यते।
सूर्योचन्द्र मसोर्योगाद्  हठयोग निगद्दते।।
(सिद्ध सिद्धान्त पद्दति १/६९ --गुरु गोरखनाथ)

उक्त श्लोक हठयोगको हो। यसमा भनिएको छ– हकार भनेको सूर्य नाडी हो अर्थात् हाम्रो दाहिने नासिका र ठकार भनेको चन्द्र नाडी हो अर्थात् हाम्रो देब्रे नासिका। जब दुबै नाडी सम भएर तेस्रो नाडी शुषुम्ना खुल्छ त्यस अवस्थालाई हठयोग प्राप्त भएको अवस्था भनिन्छ।

यो श्लोकमा सूर्य र चन्द्र शब्दको प्रयोग संयोग मात्र होइन। गुरु गोरखनाथ हठयोगी भएको हुनाले, उहाँले नेपालमै तपस्या गरेको हुनाले र  नेपाल हठयोग सिद्ध हुने भूमि भएकाले उहाँले  नेपाली झण्डामा चन्द्र सूर्य इंकित गर्न लगाउनुभयो। अर्थात्, गुरु गोरखनाथकै निर्देशनमा नेपालको झण्डाको यो स्वरुप बन्यो। यसबाट नेपाल योगभूमि हो भन्ने कुरा प्रष्ट हुन्छ। 

नेपालमा तपस्या गर्नुभएका हजारौँ ऋषिमुनिबाट पनि नेपाल योगभूमि हो भन्ने कुरा प्रष्ट हुन्छ। यसरी नेपाली ध्वजाको निर्माण भयो। यो ध्वजा पवित्र  छ। त्यसैले यो ध्वजालाई हिन्दू र बौद्ध मन्दिरमा राखिन्थ्यो। यो ध्वजाले नेपालको योग संस्कृति संस्कृतिसँग पनि जोडिएको छ। त्यसैले नेपालीको

आत्मामा पनि बसेको छ। अब यहि कुरा झण्डा फेर्न पर्छ भन्ने झुण्डलाई पच्दैन किनभने उनीहरु योग र हिन्दू नाम सुन्न रुचाउदैनन्। 

किन रुचाउन्नन् भन्दा आफ्नो धर्म उनीहरुले डलर-युरोमा बेचिसके !

अब नेपाली ध्वजाको रङको विश्लेषण गरौँ। झण्डाको रातो रङ प्रकृति माता शक्तिको प्रतीक हो। सेतो रङ ज्ञान शान्ति आनन्द र सम्पूर्णताको प्रतीक हो। नीलो रङ शिव भगवानको प्रतीक हो। त्यसैले शिव भगवानलाई नीलकण्ठ भनिन्छ। यसबाट के निश्चित हुन्छ भने परमात्मा शिव र शक्तिले बनाएको पालन र संरक्षण गरेको देश हो यो !

यहाँ कोही नरपिशाचले सधै शासन गर्न सक्दैन। अब सत्यको जीत हुन्छ ! एक दिन सच्चा नेपालीको शासन आउँछ। त्यो दिनको प्रतीक्षा गरेर हुँदैन ! त्यो दिन हामी लागिपरेर ल्याउनुपर्छ ! 

अन्तिममा, योभन्दा अतियुक्ति हुँदैन– 'जबसम्म चन्द्रसूर्य रहन्छ तबसम्म नेपाल रहन्छ नेपाली झण्डा रहन्छ।' 

जय नेपाल ! जय नेपाली झण्डा! ओम!