सुरुङभित्रको चार तले ठूलो घर बराबरको क्षेत्रफलमा ट्रान्सफर्मर, जेनेरेटर, स्विच गिएर, भल्बजस्ता ठूल्ठूला उपकरण र मेसिन जडान भइसकेका छन् । विद्युत् गृह सञ्चालनमा आएपछि तिनको सबैखाले जानकारी लिएर नियमन गर्न माथिल्लो तलामा ‘कन्ट्रोल रुम’ समेत तयार भइसकेका छन् ।
अब मेसिन तथा उपकरण जडान गर्न केही पनि बाँकी छैन । तामाकोसी नदी नै थुनेर ल्याइने पानी बग्ने ठूल्ठूला पाइप विद्युत् गृहभित्र जोडेर तयार पारिएको छ । त्यही पाइप हुँदै विद्युत् गृह प्रवेश गर्ने पानीले घुमाएर ऊर्जा उत्पादन गर्ने ६ वटै टर्बाइन घुम्न तयारी हालतमा छन् ।
बाँधस्थलबाट सुरुङ र पेनस्टक पाइपमार्फत खसालिएको तामाकोसी नदीको पानीको फोहोराले यी ‘टर्बाइन’ घुमाएपछि त्यसबाट निकालिएको ऊर्जाले नै मुलुकलाई बिजुली दिन्छ ।
