काठमाडौं । निर्वाचन आयोग बल्ल नेपाल कम्युनिस्ट पार्टी (नेकपा) को आधिकारिकताबारेको विवाद निरुपण प्रक्रियामा प्रवेश गरेको छ । यसअघि आधिकारिकताका लागि कुनै पनि पक्ष प्रक्रियासम्मत ढंगले नगएकाले कसलाई आधिकारिकता प्रदान गर्ने भन्नेमा आयोग अलमलमा परेको थियो । गत पुस ५ गते प्रधानमन्त्रीको सिफारिसमा राष्ट्रपतिले प्रतिनिधिसभा विघटन गरेपछि नेकपा राजनीतिक रुपमा विभाजन भएको थियो । नेकपा राजनीतिक रुपमा विभाजन भएसँगै एउटा पक्षको नेतृत्व प्रधानमन्त्री केपी शर्मा ओलीले गरिरहेका छन् भने अर्को पक्षलाई पुष्पकमल दाहाल ‘प्रचण्ड’ र माधवकुमार नेपालले संयुक्तरुपमा नेतृत्व गरेका छन् । 

दुवै पक्षले आफ्नो नेतृत्वको नेकपा नै वैधानिक रहेको दावी गर्दै आएका थिए । दुवै पक्षले आफुलाई आधिकारिक दावी गरे पनि उनीहरुले राजनीतिक दल सम्बन्धी ऐनमा उल्लेखित आधिकारिकता विवादसम्बन्धी व्यवस्थामा टेकेर आयोगमा निवेदन भने दिएका थिएनन् । दुवै पक्षले केवल आफ्नो नेतृत्वको पार्टी कमिटीले गरेको निर्णयबारे आयोगलाई जानकारी गराएका थिए ।

मंगलबार प्रचण्ड–माधव पक्षले आयोगको केन्द्रीय कार्यालय पुगेर आवश्यक प्रमाण र निर्णयसहित आधिकारिकताको दावी पेश गरेको छ । यसबाट आयोगलाई ऐन अनुसार नेकपा आधिकारिकता विवादको टुंगोमा पुग्न प्रक्रिया अघि बढाउन सहज भएको जनाइएको छ ।