दुई दशकअघि पतिको साथ गुम्यो। पाँच छोरी र एक छोरा हुर्काउने अभिभारा उनमा आयो। छोरी सलमा खातुन काखमै थिइन्। त्यतिबेलै उनका पिताले यस दुनियाँबाट बिदा लिए। सलमासहित ६ जना छोराछोरीको लालनपालनको भार मुनीमाथि पर्यो। जनकपुरधाम नगरपालिका–४ की मुनी खातुनका लागि आफू सम्हालिएर बच्चा हुर्काउनु उति सजिलो थिएन।
अक्षर र किताबसँग भेट नभएकी उनलाई कलिला बालबच्चा लालनपालन गर्न कुनै उपाय फुरेन। एक महिनाजति पिताको घरमा आश्रय लिएर जसोतसो मन थामेर आफूलाई सम्हाल्ने कोसिस गरिन् उनले। त्यसपछि उनी लागिन् रोजगारीको खोजीतर्फ। अलिक दिन मजदुरी गरिन्। तर भारी काम गर्न उनको शरीरले साथ दिएन।
उनी मजदुरीको काममा धेरै समय टिक्न सकिनन्। बेकामे बस्दा घरखर्च चलाउन मुस्किल भयो। अब के गरेर बालबच्चाको जीवन धान्ने भन्ने चिन्ताले रन्थनिइन् उनी। त्यही बीचमा उनको दिमागमा एउटा उपाय फुर्यो। राजमिस्त्री पिताका कारण छिमेकी अजित साहसँग घनिष्ट सम्बन्ध थियो खातुन परिवारको।
