लिग टु क्लब चेल्टेनहम टाउनमाथि पूनरागमन जित निकाल्दै म्यानचेस्टर सिटीले एफए कपको प्रि–क्वाटरफाइनलमा स्थान बनाएको छ।

चेल्टेनहममा शनिबार राति भएको खेल  सिटीले एक गोलले पछि परेको अवस्थामा अन्तिम १० मिनेटमा ३ गोल गरेपछि ३–१ को पूनरागमन जित निकाल्दै अन्तिम १६ को यात्रा तय गरेको हो।

सिटीको पूनरागमन जितमा फिल फोडेन, गाब्रियल जेसस र फेरान टोरेसले गोल गरे। घरेलु टोलीका एल्फी मेको गोल सान्त्वना बन्यो।

५९औं मिनेटमा एल्फी मेले घरेलु टालीलाई १–० ले अघि बढाए।  ८१औं मिनेटमा जोओ क्यान्सेलोको पासमा फिल फोडेनले गोल गर्दै सिटीलाई खेलमा फर्काए।

८४औं मिनेटमा जेससले गोल गर्दै सिटीलाई २–१ को अग्रता दिलाए। ९०औं मिनेटमा इल्केए गुन्डोगानको पासमा फेरान टोरेसले गोल गर्दै सिटीलाई जित दिलाए।

अब सिटीले क्वाटरफाइनल प्रवेशका लागि स्वान्सी सिटीको सामना गर्नेछ।