नवराज पराजुली
सन्दीप लामिछाने भारतमा थिए । आईपीएल खेल्न । मोदी नेपालमा थिए । नेपाल खेल्न । सन्दीप बल लिएर भारतमा दौडिरहेका थिए । विराट कोहली हातमा ब्याट लिएर पर्खिरहेका थिए ।
त्यतिखेर केपी ओली बोली लिएर जनकपुरतिर दौडिरहेथे । नरेन्द्र मोदी हातमा माइक लिएर उभिरहेका थिए । हामी नेपालीको नाकमुख बन्द हुनेगरीको नाकाबन्दीपछि मोदी नेपाल आएका थिए । माग्नुपर्थ्यो तर मोदीले नाकाबन्दी गरेकोमा माफी मागेनन् । बरु ओलीले मोदीसँग मागे । माफी हैन । अरू नै केही ।
दुबै सायरहरू मिलेर जनकपुरमा मुसायरा गरे । मोदीले सीता रामको कहानी सुनाए । ओलीले उखान सुनाए । सक्यो । मट्याङ्ग्राको नास ।
लाचार नेपाली जनताले केही गर्न सकेनन् ।
तीनै लाचार नेपालीहरू संसारभरीबाट सन्दीपले भारतमा खेलिरहेको त्यो क्रिकेट खेल हेरिरहेका थिए । सारा नेपालीहरू चाहन्थे कि हाम्रो सन्दीपले विराट कोहलीलाई आउट गरुन् । कारण थियो- नेपालीले विराट कोहलीमा नरेन्द्र मोदी देख्थे । कारण थियो- कोहली भारतका सबैभन्दा शक्तिशाली ब्याट्सम्यान थिए । मोदी भारतका सबैभन्दा शक्तिशाली मान्छे ।
जसरी भारत सरकारले नेपाल सरकारलाई हेपेको थियो त्यसरी नै नेपाली चाहन्थे कि सन्दीपले पनि विराट कोहलीलाई क्याच आउट नगराउन् । एल बी डब्लुमा नपारुन् । सिधा क्लिन बोल्ड गरुन् ।
