दिनेश गौतम
याे घरमा बालकृष्ण शमशेर राणाले पहिलाेपल्ट च्याँ गरे । उनले थैं.. थैं... गरेकाे । पहिलाे कदम चालेकाे, हुर्केकाे, शमशेर राणा नाम काटेर बालकृष्ण सम बनेकाे घाेषणा गरेकाे घर कस्ताे हाेला ?
प्रिय पाठक, आज हामी बालकृष्ण समकाे ऐतिहासिक घर हेर्न ज्ञानेश्वर जाऔँ ।
भव्य मल्लकालीन शैलीकाे दरबारजस्तै देखिन्छ । तर, सुनसान । आँगनमा केही रुखहरू ठडिएका छन् । पात झरेका हाँगा र सुकेका झारले दरबार जेलिएको छ । कतैकतै देखिन्छ सेतो रङ्ग । ठिङ्ग उभिएको उजाड, खण्डहर र रुग्ण बंगला । घरलाई टेकाले अड्याइएको छ ।
टुँडालमा परेवाको गुँड । चिरबिर चिरबिर चराको आवाजबाहेक मान्छेको आवाज सुनिँदैन । कवि, लेखककाे घरमा चराहरू मालिक हुन आउँछन् ।
नाट्यसम्राट सम विसं. १९५९ साल २४ माघमा यहाँनेर जन्मिएका थिए । ज्ञानेश्वरको याे अहिलेको उजाड महल जहाँ उनको शैशवकाल बितेको थियो ।
