अशेष मल्ल
– सेतो कागज देखाउँदै नेताले भन्यो– यो कालो हो ।
– कार्यकर्ताहरूले पररर ताली पिट्दै भने– हो, यो कालै हो
– निख्खर कालो– नेताले जोड दिँदै भन्यो
– हो, निख्खर कालो– कार्यकर्ताहरू अझ ठूलो स्वरमा कराए ।
– आजदेखि यस्तो रङ्गलाई कालो भनिनेछ ।
– हामी आज्ञा पालन गर्छाैँ
– यो कालो रङ्ग हो
– कालो हो, कालो
कार्यकर्ताको समर्थनले नेताको अनुहार तेजिलो देखियो । एक कुनामा यो दृश्य हेरेर बसेको बालकलाई पटक्कै चित्त बुझेन । ऊ जुरुक्क उठेर न्यायालय पुग्यो र उजुरी हाल्यो । उसको जिकिर थियो सेतोलाई कालो भन्न पाइँदैन ।
न्यायालयले फैसला दियो– यो कालै हो ।
बालकले पुलुक्क हेर्याे, कालो भन्नेहरू सबैले कालो चस्मा लगाएका थिए ।
बालकले प्रतिवाद गरेन किनकि उसलाई थाहा थियो, फैसलाको विरोध गर्नु कानुनविपरीत हो ।
