मधु राई
पल्टने बुवाको अनुपस्थितिमा आमाले घरमूलीको भूमिका निर्वाह गर्नु हुन्थ्यो। कंकट (घरेलु बिँडी) खाने र दिउँसो भाती जाँड खाएर एकछिन ढल्कने उहाँको बानी थियो। राति सुत्नुअघि उहाँ कहिलेकाहीँ आफैले बनाएको एक गिलास घरेलु मदिरा पिउनु हुन्थ्यो।
आमाले निर्वाह गर्ने बहुभूमिकासँगै आमाका ती आनीबानी मेरो मानसपटलमा ताजै छन्। कहिलेकाहीँ कंकट सल्काउन मलाई भान्सामा पठाउनु हुन्थ्यो। नसल्किएपछि एक सुर्का तान्थेँ। अनि मात्र सल्कन्थ्यो। धन्न बानी भने परिनँ।
त्यति वेला घरघरमै मदिरालगायत कोदो र चामलको जाँड बनाउने चलन थियो। आमाले बनाउने ती मदिराजन्य वस्तुमध्ये कोदो र चामलको जाँड तथा तोङ्बा कस्तो भयो भनेर चाख्नु पथ्र्यो। पाहुनालाई आदरसत्कार गर्न ती सामग्री चाहिन्थ्यो। बुवाले मासिक पठाउने पैसा अपुग हुँदा आमाले तिनै मदिराजन्य वस्तु बेचेर गर्जो टार्र्नु हुन्थ्यो।
