फिफा विश्वकप-२०२२ तथा एसियन कप-२०२३ अन्तर्गत दोस्रो चरणको छनोट खेलमा नेपाल जोर्डनसँग पराजित भएको छ।
कुवेत सिटीस्थित जाबेर अल अहमद अन्तराष्ट्रिय स्टेडियममा सोमबार भएको खेलमा नेपाल जोर्डनसँग ३-० गोल अन्तरले पराजित भएको हो।
जोर्डनलाई जित दिलाउन बाहा फाइजल सिफले दुई र याजन अल अरबले एक गोल गरे।
खेलको २४ औं मिनेटमा बाहा फाइजलले पेनाल्टीमा गोल गर्दै जोर्डनलाई सुरुवाती अग्रता दिलाएका थिए। ४९ औं मिनेटमा बाहा फाइजलले व्यक्तिगत दोस्रो गोल गर्दै जोर्डनलाई २-० को अग्रता दिलाए।
त्यसपछि खेलको ६७ औं मिनेटमा डिफेन्डर याजनले हेडरबाट गोल गर्दै जोर्डनलाई ३-० को जित दिलाए।
जितसँगै समूह 'बी' को जोर्डनले ६ खेलमा १३ अंक जोडेको छ। जोर्डन अंक तालिकाको दोस्रो स्थानमा उक्लिएको छ।
नेपालले ७ खेलमा ६ अंक बनाउँदै चौंथो स्थानमा रहेको छ।
अब नेपालले समूह चरणको अन्तिम खेलमा अष्ट्रेलियासँग शुक्रबार खेल्नेछ।
(सबै फाेटाे एन्फाबाट)
