सर्वोच्च अदालतले प्रतिनिधिसभा विघटनविरूद्ध परेका रिटमा नेपाल बार एसोसियसनसँग विज्ञ पठाउन माग गरेको छ। 

प्रधानन्यायाधीश चोलेन्द्रशमशेर राणासहित न्यायाधीशहरू हरिकृष्ण कार्की, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसीको संवैधानिक इजालाशले कानून व्यवसायीहरुको छाता संगठन बारसँग ‘एमिकस क्युरी’ झिकाउने निर्णय गरेको हो।

गत आइतबार बसेको मन्त्रिपरिषद् बैठकले प्रतिनिधि सभा विघटन गरी आगामी २०७८ वैशाख १७ र २७ गतेका लागि निर्वाचन गर्ने निर्णय गरेको थियो।

त्यसविरुद्द सर्वोच्चमा १३ रिट परेको थिए। बुधाबर बसेको प्रधानन्यायाधीश राणाको एकल इजालाशले संवैधानिक इजालाश गठन गरेका थिए। 

के हो एमिकस क्युरी ?

एमिकस क्युरी अदालतले इजलाशलाई सहयोग गर्न बनाउने विज्ञको टिम हो ।

इजलासले आफू समक्ष विचाराधीन रहेको कुनै मुद्दाको प्रकृति र गम्भीरतालाई विचार गरी कुनै विषयमा विशेष ज्ञान र अनुभव रहेको कानुनको प्राध्यापक, कानुन व्यवसायी र विषयविज्ञ वा त्यस्तो विषयमा विशेष योगदान पुर्‍याएको कुनै व्यक्तिलाई इजलासको सहयोगी (एमिकस क्युरी) को रूपमा झिकाई निजको राय लिन सक्नेछ ।