.jpg)
कैलालीको भजनी नगरपालिका-६ का बिष्णु गिरी अचेल प्राय: जंगलमा भेटिन्छन्। ५-७ जनाको टोली लिएर उनी बिहानदेखि साँझसम्म सिमलका ठूला रूखमा लागेका मौरीका घार खोज्छन्।
केही दिनअघि उनको टोली जोशीपुर गाउँपालिका-३ को हरियाली पार्वती सामुदायिक वनमा पुगेको थियो। टोली सदस्यले पराल, पगाहा, केराका सुकेका पात, हँसिया, बाल्टी, सलाईलगायत सामग्री बोकेका थिए।
मंसिर पहिलो साता नै बिष्णुले मह काट्न रूखमा चढ्ने, पगाहा (दाम्लो) तान्ने, मह निचोर्ने, आगो बाल्ने काम गर्ने मान्छे जम्मा पारेर टिम बनाएका थिए।
टिममा केही महिला पनि छन्।
जोशीपुरको जंगलमा पनि उनीहरूले सुरूमा अग्लो सिमलको रूखमा लागेको मौरीका घार हेरे। मौरी भेटाएपछि रूख चढ्ने योजना बनाए।
दुई जनाले रूखमूनि सुकेका पातपतिंगर जम्मा पारे। आगो बाले। भित्र सुकेका केराका पात हालेर बाहिरबाट हरिया पात हालेर धुँवा आउने राँको बनाए।
.png)
