बोरुसिया डर्टमुन्डले जर्मन बुन्डेसलिगामा वेर्डर ब्रेमेनमाथि उसकै मैदानमा संघर्षपुर्ण जित निकालेको छ।
अघिल्लो खेलमा भिएफबी स्टुटगार्टसँग लज्जास्पद हार बेहोरेको डर्टमुन्डले ब्रेमेनमा मंगलबार राति भएको खेलमा २–१ को जित हात पारेको हो।
डर्टमुन्डको जितमा राफायल गुरेइरो र मार्को रिउसले गोल गरे। घरेलु टोलीका केभिन मोहवाल्डले एक गोल फर्काए।
खेलको १२औँ मिनेटमा राफायल गुरेइरोको गोलबाट डर्टमुन्डले अग्रता लिएको थियो।
२८औँ मिनेटमा केभिन मोहवाल्डले गोल गर्दै खेललाई पहिलो हाफमा १–१ गोलको बराबरीमा ल्याए। उनले म्याक्सिमिलियन इगास्टिनको पासमा गोल गरेका थिए।
७८औँ मिनेटमा डर्टमुन्डले पेनाल्टी पायो। तर कप्तान मार्को रिउस पेनाल्टीमा चुके। गोलरक्षक पाभेलेन्का बल प्रहार गर्नुअघि नै अघि बढेपछि डर्टमुन्डले पुनः पेनाल्टी पाएको थियो।
रिउस दोस्रो पेनाल्टीमा सफल हुदै डर्टमुन्डलाई २–१ को अग्रता दिलाए। त्यसपछि थप गोल नहुँदा डर्टमुन्ड विजयी भयो।
जितसँगै डर्टमुन्ड १२ खेलबाट २२ अंक जोडेर चौथो स्थानमा उक्लिएको छ। पराजित ब्रेमेन ११ अंकसहित १३औं स्थानमा छ।
