कृष्णसिंह लाेथ्याल
त्रिभुवन विश्वविद्यालय (त्रिवि) केन्द्रीय क्याम्पस कीर्तिपुरका उपप्राध्यापक प्रेमबहादुर चलाउनेमाथि सांघातिक आक्रमण गर्ने आरोपीलाई पुर्पक्षका लागि जेल चलानको माग गर्दै सरकारी वकिलको कार्यालय, काठमाडौं उच्च अदालत पाटन पुगेको छ ।
जिल्ला अदालत काठमाडौंले चलाउनेमाथि आक्रमण गर्ने मुख्य अभियुक्त हरि आचार्य र योगेन्द्र रावलसहित सबै आरोपीलाई धरौटीमा छाड्ने आदेश दिएपछि सरकारी वकिलको कार्यालय उच्च अदालत पुगेको हो ।
उच्च अदालत पाटनले चलाउनेको मुद्दाको पेशी बिहीबारका लागि तोकेको छ । १५ मंसिरमा काठमाडौं जिल्ला अदालतका न्यायाधीश अम्बिकाप्रसाद निरौलाको एकल इजलासले आचार्य र रावललाई जनही ५५ हजार रुपैयाँ धरौटी लिएर छाड्न आदेश दिएको थियो । उनीहरू सोही दिन धरौटी बुझाएर छुटेका थिए । आचार्य र रावल प्रहरीको फरार सूचीमा रहे पनि प्रहरीले पक्राउ गर्न सकेको थिएन । तर, आफैँ अदालतमा हाजिर भएका थिए ।
आचार्य र रावलबाहेक अन्य आरोपीहरू रुपेश साह, रबिनकुमार लामा, सयुस श्रेष्ठ र निरज रानामगरलाई भने प्रहरीले २५ दिन थुनामा राखेर अनुसन्धान गरेको थियो । पक्राउ परेका साहलगायतले हरि र योगेन्द्रकै योजनामा चलाउनेमाथि आक्रमण गरेको प्रहरीसँगको बयानमा भनेका थिए ।
